'O core

Inutilmente scava ‘o core mio
dint’ò turreno sicco d’ò passato !
Se sò abbrusciate è sciure d’è vint’anne
e s’è sperduto ò suonno à me sunnato…
Tu t’affatiche, oj core, e sude sango !
Nun pienze che ll’anne e ò tiempo vola,
ca tutt’è duje 'nce facimmo viecchie,
e niente cchiù ce sta ca 'nce cunzola ?
Si scavanno truvasse na frunnella
è nu sciore d’à primma giuventù
secca, spezzata, senza cchiù culore,
dimme, oj core, che ne facisse cchiù ?
Sultanto indifferenza sta pè nuje,
ca pure chi putesse fa quaccosa
scarpèsa stu turreno e pè dispietto,
'nce pianta quacche spina e no na rosa…
Cerca è campà sta vita ca se campa,
nun ‘mporta ca te costa cchiù dulore,
si nun te piace scavate nu fuosso,
tanto, che campe a ffà, meglio si muore !