giovedì 10 dicembre 2009

Campana e Napule






Dicembre,
trase fredda sta vernata !
ra mezzanotte e pe
tutt’a nuttata
'a neva è scesa fitta
e senza fine
sciuccanno comm’a
tanti giusummine.
Sott’a stu cielo,
semmenato e stelle,
sotto a luce e sta
luna fredda e stanca,
sott’a sta neva,
a cierro e a palumelle,
'sta terra s’è ammantata
'e seta janca.
Guardanno da fenesta,
schiaranno juorno,
è tutto nu ricamo
attuorno attuorno:
pizz’e merletto e case,
e vie, a campagna,
'na francia e sciallo
e cimme da mutagna.
A sta mutagna,
ca vasann’o cielo,
arriva l’eco
da bufera e o viento.
Attuorno nu silenzio
'nu squallore,
'nu friddo traseticcio
ca se more,
nun c’è na fronna,
nun c’è n’auciello,
ma spont’o sole
ca fa tutto bello !
E sona a campana
stammatina,
'a campana da chiesa
do cunvento,
e le risponne nata
llà vicino,
po’ nata,
nati diece,
nati ciente,
e cu na catena e chiese
e cchiù luntane
s’intreccia a vocia
santa e sti campane,
passa deserti,
monti, sciumme
e mare
e và po’ munno, a
do ce sta n’altare,
e và po munno a
do ce sta na croce
ca parl’o core
e carità fraterna,
ca saglie ncielo
milon’e voce
cu a stessa fede
ca fa na chiesa eterna !
Campana,
voc’e Dio,
voc’e preghiera,
'stu suono parla o core
e una manera.
'O muto prega
senza dì parola,
prega 'o cecato
can un ver’osole,
prega chi soffre.
prega 'o peccatore,
prega ll’umanità
ch’è travagliata,
prega chi serv’a Dio
nostro signore,
prega…
prega chi ver’o
munno nzaguinato.
Se prega rint’a
chiesa do cunvento,
'miez’e valangh’e neva,
'o firddo je viento,
là ncimm’o monte
addò grandios’e bella
se trov’a carità
ca c’affratella.
Sona 'a campana,
sona stammatina,
raccogle sti preghiere
je porta ‘n cilo
e ne fa 'n’offerta
pe Gesù Bambino
luce do' munno,
nato miez’o gelo.

' O funerale










Dicembre,
aria fredda e fina,
p’ò cielo camminano
nuvole a centenare,
mentre pe’ l’aria
se perde
‘o suon’ e ‘na campana.
Songo rintocchi
lenti e malinconici,
rintocchi tristi,
parlano ‘e morte…
‘Nanz’a chiesa, ‘na folla,
tanta gente…
dinto, ‘nanz’ ‘a l’altare,
miez’a quatte cannele,
‘nu tavuto…
‘ncoppo ‘nu mazz’e sciure,
tre rose rosse
e nu biglietto.
Che silenzio,
che rispetto…
chisà pecchè,
pecchè è muorto…
‘Na mamma chiagne ‘o figlie
suoje perduto,
‘o pate, zitto, se dispera,
arreto, e frat’ ‘je sore
nun se fanno capace
comm’è succieso
e pecchè l’ha fatto.
Mentre stu chianto
fa eco dint’a chiesa muta,
a spalle portano fòre
chillu tavuto.
‘A gente se scosta
se scanza,
facennese ‘a coroce
pe ‘lurdemo saluto,
e s’addimanne, curiosa :
ma chi è ‘stu muorto ?
Era ‘nzurato ?
Giovane ?
Ma steva malato ?
L’ha fatto p’ammore...
o pe denaro ?
Ma ‘o muorto s’alluntana
purtannese cu jsso
ogni segreto.

giovedì 19 novembre 2009

Dint' ' nuttata








Quann’è ll’ora cuièta d’à notte,
ca nisciuno p’à strada se sente,
io me sceto e me tornano ‘a mente
e juorne belle passate cu’ ttè.
Era de maggio ! Nu profumo d’arancie
saglieva pe’ chest’aria liggere liggera,
e tu pure, dint’ ò lietto, pensavi…
chisò jsso si me penza e che fa.
Chitarra ca suon’à luntano,
io te sento e, penzanno , m’affaccio,
sta musica, a cchiù tennera, ‘ saccio,
ati tiempe me vò arricurdà.
Chitarra ca’ parl’à stu core,
a mme par’e sentì, chiano chiano,
tutt’intera ’ na’ storia ‘a ‘sta mano,
ca’sunonno a chest’ora me stà.
Ma stò sulo e pecchè nun se sape
e chest’anema, sola, s’àcquieta
e, sentennete, continua a sperà !

domenica 11 ottobre 2009

Penzanno atte









‘Sta faccella
e chist’uocchie
‘ncantati
tu nun saje
che male me fanno,
songo mise che stongo
patenno,
songo mise ca soffro
pe tte.
Ah che scemo,
che scemo so' stato
me crerevo ca tu me capive,
me crerevo ca tu me vulive...
e, invece, nun pienzo
cchiù a me.
‘Sto mpazzenno
e a me sulo addimanno:
c’aggiu fatto
p’avè sti turmienti ?
notte e juorne
te penzo e tu…
tu niente,
tu nun pienzo
c’a io moro pe tte ?
Ma pecchè cu chest’anema
sperza
tu cchiù core’ e
cuscienza nun tiene ?
Ma pecchè
sempo 'nzuonno
me viene ?
Ma pecchè
nun te pozzo
scurdà ?

C'aggio fatto e che vulevo fa







Spisso, troppi vòte,
sentenneme deluso,
afflitto, stanco
e scoraggiato,
haggio cercato e capì
a rò venevo st’insoddisfazione
e m’aggio addimannato :
ma c’aggio fatto
e che ne vulevo fà
e ‘sta vita ca è passata ?
Songo io
ca nun so maje
cuntento
o ‘a gente,
si pure ‘miez’e guaje.
è allera overamente ?
Creriteme è accussì :
cchiù gruosse
songo e guaje
cchiù e cose
vanno storte
cchiù l’ommo
è suddisfatto.
Oggi esiste ‘a legge
d’o cchiù forte,
basta ca’ ‘stò bbuono io
e l’àti chi se ne fotte.
Ma comm’è diventato
chisto munno,
si a gente, strafottente,
penza sulo a sé ?
Comme se po’ ‘ghi annanzo
cu ‘tanta indifferenza,
comme se po’
campà
senza ‘nu poco e bbene ?
“Oggi l’egoismo
ed il proprio tornaconto
è quello che prevale realmente.
Per questo ci ammazziamo,
rubiamo,
facciamo rapine,
stupri
e rapimenti
e ci autodistruggiamo
volutamente.”
S’è perduto ogni valore
e l’ommo nun ha capito
ca ‘a vita nun è vita
senza ‘nu poco r’ammore,
senza vulersi bbene,
ca ‘a vita nun è niente
senza rispetto,
senza cumprensone.
Facimmo e corze,
c’affatricammo,
parimmo ‘e pazzi
d’a matina ‘a sera…
e fermamece pe ‘nu mumento,
fernimmo e recità
‘ncopp’a ‘sta scena…
guardammo ‘nfaccia a realtà.
“ Se ognuno desse la mano
al suo vicino, saremmo
tutti una famiglia,
debelleremmo il male,
l’incordigia, l’egoismo,
provando finalmente un po’
di bene “
Ecco, perché me sento
insoddisfatto,
pecchè tenenno
annanzo all’uocchje
‘sti problemi
nun sò capace e reagì.
Eppure, vulesso ca’
ferensse stà cummedia,
cà l’ommo s’arrennesse,
peccchè o mal’è na catena
can un se spezza cchiù !

Viento









Viento ca passe
e vajo currenno
sempe
cumm’a nu piccerillo
chieno e foja…
Tu…tu ca già cunusce
‘ a casarella soja,
oj ventariello,
passace pe’llà…
Passece, và,
e si stà nghus’arinto,
fermate nnanz’e llastre
‘da fenesta…
smuovele tutt’e sciure
‘a dint’a testa,
fa ca s’affaccia
e doppo parlale’e me…
Ma si pe caso, tu,
rerenno a truova
‘nzimo cu nato
e parlano d’ammore…
Oj ventariello,
famme nu favore:
‘mpizzete mmiezo
e nun e fa vasà.

Vierno










P’o cielo arie e tempesta,
sole nascosto…
fra terra e mare
nuvule a cetenare.

Cu e primme fridde ven’a
pucundria,
vierne trase…
che malinconia.
Si na speranza tiene
‘rint’o core,
lenta e triste
se ne more !
Addio sole d’estate
‘e serenate,
cantate p’e ciardine
e meiez’e vie.
Addio nuttete belle,
cieli puntiat’e stelle,
si site nammurate
e và lassate
che malinconia !
Vola n’auciello,
‘spirzo miezo
e snez’ammmore
comme sciperzo
và stu core.
Scorre pe’ titte l’acuqa
e miez’e vie,
vierno trase
che nustalgia !
Addio carezze, vase,
addio surrise
miez’addore d’e sciure
je panni ‘spase…
Addio sole d’estate,
addio tiempe passate,
si siete nammurate
e va’ lassate
che pucundria !
P’ò cielo aria e tempeste
oj bella estate, addio…
more ll’ammore mio

e vierno trase.

domenica 6 settembre 2009

Serata 'e luna







A luna ascette
ampresso l’ata sera,
‘e io p’ ‘a fenesta aperta,
‘ncantato, m’ ‘a guardaje.
Guardeje
tutt’ ‘o cammino
ca facette.
Primmo cuccaje
pe’ ‘nterra,
ncopp’a l’evera ‘nfosa,
l’ombra e ‘nalbero
‘e fiche,
e ‘st’ombra se muveva,
quacche vota,
sott’o sciuscio d’ ‘o viento,
po’ venette
a du me,
‘ncoppo a fenesta,
e se mettette,
tutta storta,
‘ncoppo a petturata.
A poco a poco, po’
se ne sagliette
dint’a ‘na testa
c’addeventaje d’argiento
pecchè tanno tanno
arracquata.
Quanto tiempo passaje !
quanno me ne trasette,
l’ombra mia
se calaje ‘ncopp ‘o cuscino,
addò steva
ninno addùrmuto,
e so' vasaje primm’e me…
allora io m’accustaje,
cammenaje chanu chianu
pe nun ‘ o fa scetà,
o vulevo vedè.
Ninno rereva
d’int’o suonno,
ogni tanto,
appena, appena…
Sentetto sott’e dete
chilli capilli e seta…
duorme figlio mio bello,
duorme, fa nonna nonna
sott’a ‘sta luna chiena,
sott’o manto celeste
d’ ‘a Madonna…
Tu si tutto pè mme,
gioia e furtuna,
duorme nun te scetà,
fa nonna nonna
dint’a ‘sta cunulella
tutta ‘nzuppata e luna !

Settembre







Son’ ‘a campana
‘e ‘sta chiesa
vicina,
sent’o rilogio
ca’ vena ‘a luntano,
comm’è bella
chest’aria
settembrina
ca’ dint’o core scenne
chiano chiano.
Scenn’o sole
è ‘a sera s’avvicina,
dint’o silenzio
sulo allucche
d’ ‘e cane
e duje ‘nammurate,
p’ ‘e strade cittadine,
camminano
tenennese p’ ‘a mano.
‘Nu penziero
me martella ‘o core
e djnt’ ‘a l’anema
sento ‘na voce
ca ‘chiagne
e nun trova pace.
Ave ragione,
pecchè stò sulo
e senz’ammore,
e mentre penzo
a tanti cose doce,
mentre ricordo
tanti cose belle
p’ ‘o cielo
sento
‘e cantà
‘na rondinella !

venerdì 21 agosto 2009

Pecchè







Pecchè quanno te fisso
dint’a chist’uocchie care
me stupetesco e pare
ca’ nun capisco cchiù ?
Pecchè, tra tanti facce,
sulo chesta faccella,
cchiù lucent’ ‘e ‘na stella,
fa luce sulo a mmè ?
Tutto me scordo allora,
quanno te ‘stò vicino
e comm’a nu cerino
me sento ‘e cunzumà !
Pecchè ‘stu suonno doce,
‘sta freva, ‘stu destino
passa e nun par’ ‘overo ?
dimmello tu,
dimmello tu...
percchè ?