O scugnìzziello

L’ata sera,
mentre cammenavo
pe ‘ Tuedo,
sentenn’ ‘addore
‘e robba canusciuta,
me sò ‘ fermato
‘nanz’ ‘a na vetrina.
Che bben’ ‘ e Dio
e quanta cose belle
tenev’ ‘esposte
chiullu magazzino:
viscuotte, susamille,
ciucculata, ciucculatine
e, dint’ ‘a ‘n’angulo,
vicin’ ‘ e sfugliatelle
‘na muntagna enorme
‘e pastarelle !
Ma, mentre ca’ guardavo
chesti cose bbelle,
sott’ uocchie vedette,
affianc’ ‘amme
‘nu peccerillo.
Scavezo, tutto stracciato,
‘mmiz’ ‘annuro,
cu’ ‘e mmane rosse
e’ o naso mmièzo ‘nfuso,
‘o musso spellicchiato
e l’uocchiùzzielle triste
e quase ‘nchiuse.
Comme stev’ attiento
‘stu criaturo,
niente le sfuìeve
e senza s’avvedè
ca’ io o guardavo,
facev’ ‘o segno
cu’ ‘e detelle
e pareva ca’ diceve:
m’accato chèsto,
ma no, vulesso chello !
Certo sunnava
senza fa’ ‘e cunte
cu’ ‘ a miseria.
All’improvviso,
‘cu ll’uocchie ‘nterra
je mmane dint’ ‘ a sàcca
s’avviaje pa’ stessa via.
Che pena me facette !
e ‘nap’ ‘a me penzajo:
ma vide tu ‘nu poco
‘o Pataterno
chi àve tanto…
e chi nun po’ avè niente !
Mentr’ ‘ o nennillo,
‘cu a capa ‘nterra,
se strascenàva
e scumpareva ‘mmiezo
‘a tanta gente,
‘ o chiammaje…
Guagliò…viè ‘cca !
famme sentì ‘na cosa…
ma tu tenisse famme ?
te vulisse magnà
‘na sfogliatella ?
Cu’ ll’uocchie ‘nterra,
comme si tenesse scuòrno,
‘o piccerìllo pigliaje curaggio
e squagliannèse comm’a
‘na caramella,
accumminciaje chianu chianu
a se sfucà:
che vulite sapè ‘, Siggnò,
patème è muorto
e mamma ‘stò ‘o spitale
‘o Principe ‘e Pemonte…
‘o Sanatorio!
jo jesco tutt’e ghiuorne
p’ ‘a campata !
A casa tengo ll’àti frate
e ll’àti ssòre,
e pè m’abbuscà ‘nu piezzo
e pane faccio e servizi,
guar’ ‘e machine…
veng’ ‘e sigarette americane.
Mentre ‘o nenillo
faceva ‘stu discòrso
m’ ‘o pigliaje pa’ mano
e chiano chiano,
senza ‘nce penzà doje vote
‘ncoppo,
trasette sicuro
rint’ ‘o magazzino.
“Dica, Signore,
dicett’ ‘o proprietario”
po s’avutàje attuorno
e senza sapè niente,
senza compassione,
stev’avvianne ‘nu càucio
‘o guaglione.
Ma vì che fetent' 'e mmerda
‘stu padrone !
Che core tene ‘mpietto
stu cafòne !
Che mal’ha fatto a jsso
‘stu ‘nnucente
si è nato cu’ ‘a mala ciòrta
e già pezzente !
Mentre ca’ io facevo
‘sti penziere
‘o piccirillo me tiraje
pa mano
e cu’ ‘ a vucella,
rotta e chianto, dicette:
Signò ascimmo,
nun v’appiccecàte,
nun dat’aurienzo,
je songo abituato
a’ ‘sti fetienti !
No’ cumm’ ‘a vuje,
cà peggio ‘e nu pate,
ve preoccupate
si haggio già magnato !
Sì, haggio già magnato…
ma…m’e fatico
e nun me fanno cchiù
‘mpressione chesti cose…
je v’arringrazio, Signò…
ma me ne torn’ ‘ a casa…
‘a casa mia.
Là pure si campammo
jnt’ ‘a miseria…
stammo bbùono !
Nuje simmo tutte
frat’ ‘e sore…
e ‘nce vulimmo bbene
overamente !
Povero guagliunciello,
penzaje !
Mò chi t’aiuta ?
Chi te stenn’ ‘e bbraccia ?
Chi t’accarezz’ ‘a fronte ?
A do vaje vaje
‘a gente te secuta
comm’ ‘a ‘n’appestato,
comm’ ‘a nu cane rugnuso
e o ricco,
pe’ s’accuità ‘ a cuscienza,
primmo te proja cu’ ‘ a mano
e po’ cu’ a stessa…te secuta
e tu crisce sulo…
e malamente !
Oggi scugnizzo…
e dimane, forse…
delinguènte !